ឥណ្ឌូនេស៊ី៖ អគ្គលេខាធិការអាស៊ាន លោក កៅ គីមហួន បានទទួលជួបពិភាក្សាការងារលោក Steve Olive ប្រធានបេសកកម្មតំបន់អាស៊ីរបស់ទីភ្នាក់ងារអភិវឌ្ឍន៍អន្តរជាតិសហរដ្ឋអាមេរិក (USAID) និងរដ្ឋមន្ត្រីពាណិជ្ជកម្មអន្តរជាតិ លើកកម្ពស់ការនាំចេញ ធុរកិច្ចតូច និងការអភិវឌ្ឍសេដ្ឋកិច្ចកាណាដា លោកស្រី Mary Ng នៅថ្ងៃទី២០ ខែមិថុនា ឆ្នាំ២០២៣ នៅទីក្រុងហ្សាកាតា ប្រទេសឥណ្ឌូនេស៊ី។

ក្នុងជំនួបជាមួយលោក Steve Olive ភាគីទាំងពីរបានផ្លាស់ប្តូរទស្សនៈអំពីទំនាក់ទំនងអាស៊ាន-សហភាពអឺរ៉ុប និង ផ្លាស់ប្តូរយោបល់លើមធ្យោបាយ និងមធ្យោបាយដែលមានសក្តានុពលក្នុងការជំរុញកម្មវិធីកិច្ចសហប្រតិបត្តិការអភិវឌ្ឍន៍អាស៊ាន-សហរដ្ឋអាមេរិក និងលើបញ្ហាដែលមានផលប្រយោជន៍ទៅវិញទៅមកនាពេលបច្ចុប្បន្ន។

ជាមួយគ្នានោះ ក្នុងថ្ងៃដដែលលោក កៅ គឹមហួន ក៏បានទទួលជួបពិភាក្សាការងារជាមួយ លោកស្រី Mary Ng រដ្ឋមន្ត្រីពាណិជ្ជកម្មអន្តរជាតិ លើកកម្ពស់ការនាំចេញ ធុរកិច្ចតូច និងការអភិវឌ្ឍសេដ្ឋកិច្ច របស់កាណាដា តាមរយៈអនឡាញ ដោយភាគីទាំងពីរបានពិភាក្សាអំពីទំនាក់ទំនងសេដ្ឋកិច្ចអាស៊ាន-កាណាដា យុទ្ធសាស្ត្រឥណ្ឌូប៉ាស៊ីហ្វិករបស់កាណាដា និងកិច្ចសហប្រតិបត្តិការដែលអាចកើតមានផ្សេងទៀតក្នុងការពង្រឹងទំនាក់ទំនងអាស៊ាន-កាណាដា រួមទាំងតាមរយៈការចរចាសម្រាប់កិច្ចព្រមព្រៀងពាណិជ្ជកម្មសេរីអាស៊ាន-កាណាដា។

គួរឱ្យដឹងដែរថា នៅរសៀលថ្ងៃទី២០ ខែមិថុនា ឆ្នាំ២០២៣ ដដែលនោះ អគ្គលេខាធិការអាស៊ានរូបនេះក៏បាន បន្តទទួលជួបពិភាក្សាការងារជាមួយ គណៈប្រតិភូគណៈកម្មាធិការពាណិជ្ជកម្មអន្តរជាតិ នៃសភាអឺរ៉ុប ដឹកនាំដោយលោក Bernd Lange ដោយក្នុងជំនួបនោះ ភាគីទាំងពីរបានផ្លាស់ប្តូរទស្សនៈអំពីទំនាក់ទំនងអាស៊ាន-សហភាព អឺរ៉ុប។

ទន្ទឹមនោះ លោក កៅ គីមហួន ក៏ជួបពិភាក្សាការងារជាមួយ ឯកអគ្គរាជទូតជប៉ុនប្រចាំអាស៊ាន លោក Kiya Masahiko ផងដែរ ដោយភាគីទាំងពីរបានកត់សម្គាល់ពីវឌ្ឍនភាពនៃ សមិទ្ធភាពដែលអាចសំរេចបាន និង ផ្លាស់ប្តូរយោបល់លើវឌ្ឍនភាពនៃការប្រគល់ជូនសម្រាប់ឆ្នាំទី៥០ នៃទំនាក់ទំនងមិត្តភាព និងសហប្រតិបត្តិការអាស៊ាន-ជប៉ុន ក្នុងឆ្នាំនេះ រួមទាំងការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ជប៉ុន ព្រមទាំងការត្រៀមរៀបចំសម្រាប់សន្និសីទថ្នាក់រដ្ឋមន្ត្រីអាស៊ាននាពេលខាងមុខ៕